“Tigrat” e ushtrisë kroate stërviten për t’u nisur për Kosovë në kuadër të KFOR-it

Pjesëtarët e Batalionit të 1-rë të Mekanizuar “Tigrat” të Ushtrisë Kroate kanë përfunduar fazën e dytë të stërvitjes para dislokimit për misionin paqeruajtës të NATO-s, KFOR, në Kosovë, ku në muajin maj do të marrin detyrat nga kontingjenti i 44-t kroat, njoftoi Ministria e Mbrojtjes e Kroacisë.

Si pjesë e përgatitjeve, njësia zhvilloi një cikël intensiv stërvitor 72-orësh në kazermën “Kolonel Predrag Matanović” në Petrinjë. Stërvitja u realizua pa ndërprerje, ditë e natë, me qëllim testimin dhe rritjen e gatishmërisë për operacione stabilizuese në mjedis operacional ndërkombëtar.

Komandanti i kompanisë së motorizuar, kapiten Vladimir Kordić, tha se stërvitja është konceptuar “sa më realiste të jetë e mundur”, duke simuluar kushte reale operimi përmes rotacionit të njësive dhe kryerjes së vazhdueshme të detyrave.

Gjatë stërvitjes u ushtruan sigurimi i zonave, patrullimet, kontrolli i lëvizjeve, bashkëveprimi me popullsinë civile dhe reagimi ndaj incidenteve të sigurisë. Theks i veçantë iu kushtua komandimit, vendimmarrjes dhe koordinimit të brendshëm.

Autoritetet ushtarake vlerësuan se cikli përgatitor konfirmoi nivelin e lartë të trajnimit dhe gatishmërisë së batalionit. Pjesëmarrja në KFOR konsiderohet vazhdimësi e kontributit të Kroacisë në sigurinë dhe stabilitetin ndërkombëtar.