UEFA dënon Hungarinë, Belgjikën dhe Portugalinë

UEFA ka thënë se është duke ndërmarr veprime disiplinore kundër Hungarisë, Belgjikës dhe Portugalisë për shkak të trazirave të shkaktuara në tre ndeshjet e zhvilluara të shtunën në kuadër të Euro 2016.

Komiteti i UEFA-s për Kontroll, Etikë dhe Disiplinë ka dënuar federatën hungareze në tri akuza që ndërlidhen me sjelljen e fansave të tyre – për hedhje të mjeteve piroteknike, hedhje të objekteve dhe trazira në turma.

Një dëshmitar i Reutersit ka parë përleshjet derisa policia po ndërhynte në tribunat e Stade Velodrome në Marsejë para barazimit 1-1 mes Hungarisë dhe Islandës, dhe raportimet thonë se një lojtar i Islandës është goditur me një objekt nga turma derisa po festonin golin nga penaltia të Gylfi Sigurdsson, transmeton Koha.net.

Gjashtë fansa hungarezë janë arrestuar pasi janë parë teksa i kalojnë rrethojat për të hyrë brenda në fushën e gjelbër dhe për hedhje të fishekzjarrëve.

Proces disiplinor është hapur edhe ndaj federatës belge pasi fansat ndezën fishekzjarre dhe hodhën objekte në fushë gjatë fitores prej 3 me 0 ndaj Irlandës në Bordo.

Portugalia është akuzuar pasi së paku një fans ka hyrë në fushën e blertë pas barazimit të tyre pa gola me Austrinë, në të cilën kapiteni Cristiano Ronaldo huqi një penalti.

Seanca dëgjimore për federatën hungareze do të zhvillohet më 21 qershor, ndërsa data për dy kombëtaret tjera ende s’janë caktuar.