UEFA gjobit Real Madridin me 15 mijë euro pas përshëndetjes naziste nga një tifoz

UEFA e ka gjobitur Real Madrid dhe ka vendosur gjithashtu kufizim të kapacitetit në tribunën pas portës, pasi në stadium u evidentua një gjest me përmbajtje raciste.

Sipas gazetarit Henry Winter, vendimi erdhi pasi një tifoz u filmua duke bërë përshëndetje naziste brenda stadiumit Santiago Bernabéu gjatë ndeshjes së “play-off”-it të UEFA Champions League ndaj Benfica.

Organi qeverisës evropian ka vendosur një gjobë prej 15 mijë eurosh dhe një mbyllje të pjesshme me kusht të 500 vendeve në tribunën e poshtme jugore të stadiumit për një vit.

Incidenti ndodhi para fillimit të ndeshjes kundër ekipit portugez dhe Real Madridi lëshoi shpejt një deklaratë, duke thënë se e kishin kapur fajtorin dhe e kishin përjashtuar nga stadiumi.

“Real Madridi dënon këtë lloj gjesti dhe shprehjeje që nxit dhunë dhe urrejtje në sport dhe shoqëri”, thuhet në deklaratën e Real Madridit.

Më herët në ndeshjen e parë në Lisbonë, Vinicius Junior u ofendua në mënyrë raciste nga anësori i Benficas, Gianluca Prestianni.