60 miliardë dollarë, Senati pritet ta hedhë në votim sot ndihmën ushtarake për Ukrainën

Senati amerikan pritet ta hedhë në votim sot paketën e vonuar me ndihmë ushtarake për Ukrainën, e cila kap vlerën e rreth 60 miliardë dollarëve, pasi Dhoma e Përfaqësuesve e miratoi atë tre ditë më parë pas shumë zvarritjeve.

Paketa, e cila përmban ndihmë tejet të nevojshme për ushtrinë e Ukrainës, pritet të kalojë në Senat gjatë ditës së sotme dhe t’i dërgohet presidentit amerikan, Joe Biden, deri kah fundi i javës për t’u nënshkruar.

Biden i tha dje gjatë një bisede telefonike presidentit të Ukrainës, Volodymyr Zelensky, se Shtetet e Bashkuara “shumë shpejt do të ofrojnë paketa të reja dhe të rëndësishme të ndihmës për t’i plotësuar nevojat urgjente të Ukrainës për t’u mbrojtur”, tha Shtëpia e Bardhë në një komunikatë.

Ukraina është duke u përballur me trysni të madhe nga Rusia në muajt e fundit, për shkak se stoqet e saj me municione dhe kundërajrorë, janë duke u harxhuar dalëngadalë.

Sulmet e pareshtura me dronë dhe raketa nga Rusia në qytetet ukrainase u kanë shkaktuar dëme të mëdha civilëve dhe rrjetit energjetik të vendit gjatë këtyre dy vjetëve luftë.

Zelensky shkroi në rrjetin social X se Biden i kishte thënë se do ta nënshkruante paketën me ndiihmë për Ukrainën “menjëherë, sapo ta pranoj atë nga Senati”.

Senati mund ta kalojë paketën e madhe, 95 miliardë dollarë, e cila përmban ndihmë ushtarake edhe për Izraelin dhe Tajvanin gjithashtu, pasditen e 23 prillit, nëse arrihet pajtim shpejt për kohën e votimit. Nëse ka kundërshtime nga republikanët, atëherë ajo mund të hidhet në votim më 24 prill.

Zelensky i tregoi Bidenit gjithashtu edhe për një sulm në një kullë televizive në Harkiv, qytetin e dytë më të madh të Ukrainës, i cili ndodhi pak para bisedës së tyre telefonike.

“E njoftova presidentin Biden gjithashtu për terrorin e ajror të Rusisë, e cila po i përdor mijëra raketa, dronë dhe bomba, përfshirë për një sulm në kullën televizive të Harkivit pak minuta para bisedës sonë”, tha Zelensky.

Sulmi raketor e çau në dysh kullën televizive 240 metra të lartë. /REL/