Pse Shqipëria nuk ka asnjë avionë zjarrfikës?

Kryeministri Edi Rama ka reaguar në lidhje me diskutimet mbi nevojën për blerjen e avionëve zjarrfikës, duke theksuar se, megjithëse mund të ishte mirë që Shqipëria të kishte më shumë mjete ajrore, zjarret e ditëve të fundit nuk mund të trajtohen vetëm me avionë.

Rama ka ftuar qytetarët të shqyrtojnë më thellë shkaqet dhe pasojat e zjarreve, duke i referuar dhe situatës në vendet fqinje, si Greqia, Italia, Turqia dhe Spanja, të cilat po përballen me të njëjtin problem, pavarësisht se disponojnë flota ajrore të avancuara për zjarrfikje.

Ai ka theksuar se është e rëndësishme të kuptojmë që pasojat e zjarreve kërkojnë një qasje më të gjerë.

“Ka shpërthyer një debat pse nuk blen Shqipëria avionë zjarrfikës, ndërkohë që ka ca llogari që duhen bërë dhe zjarret e ditëve të fundit nuk janë assesi çështje e një apo dy apo edhe tre avionësh! Dakord, mirë do ishte t’i kishim, por…

Duke i siguruar të gjithë se kemi këto ditë mjete nga ajri më shumë se çdo vit më parë, falë flotës sonë dhe mbështetjes nga Mekanizmi Europian apo Emiratet e Bashkuara Arabe, i ftoj të gjithë të ngrenë një pyetje: Po fqinjët tanë, Greqia dhe Italia apo Turqia dhe Spanja, që po përcëllohen më keq se ç’do vit tjetër kanë vallë mungesë avionësh?!

Ja një informacion bazuar në referencat e vetë shtypit grek për Greqinë për shembull:

Greqia ka një flotë ajrore totale prej 77 avionësh zjarrfikës;  helikopterë janë pakashumë 20; automjete të tjera afërsisht 3,500 dhe zjarrfikëse të të gjitha llojeve e funksioneve.

Pra, e thënë thjeshtë. Sa më shumë aq më mirë padiskutim, por prapëseprapë kurimi i pasojave nuk i eliminon shkaqet, të cilat janë disa, janë njësoj për të gjithë shtetet që po i vuajnë zjarret këtë sezon (disa shumë më keq se ne meqë ra fjala) dhe janë shumë më komplekse se sa duken kur numëron avionët”, tha Rama./Periskopi/