Veterinerët: Mos e lini qenin të nxjerrë kokën nga dritarja e makinës

Edhe pse shumë pronarë mendojnë se qeni i tyre e adhuron udhëtimin me makinë, sidomos kur nxjerr kokën nga dritarja, veterinerët paralajmërojnë se kjo sjellje është e rrezikshme për shëndetin dhe sigurinë e kafshëve shtëpiake.

Veterineri Mike Paul ka ndarë së fundmi disa nga arsyet pse duhet të shmangni këtë praktikë, pavarësisht se sa i lumtur duket qeni juaj ndërkohë që era i përplaset në fytyrë.

Sipas Paul, rreziku i parë lidhet me lëndimet fizike. Gjatë udhëtimit, qeni është i ekspozuar ndaj pluhurit, insekteve, gurëve të vegjël apo mbetjeve të tjera që mund të godasin sytë, veshët apo turirin e tij. Këto grimca mund të shkaktojnë acarim, infeksione të rënda apo edhe dëmtime që kërkojnë kujdes të menjëhershëm veterinar.

Një tjetër rrezik serioz është mundësia që qeni të kërcejë nga dritarja, sidomos nëse është i emocionuar ose sheh diçka që i tërheq vëmendjen. Kjo mund të sjellë pasoja tragjike, përfshirë lëndime të rënda ose edhe humbje jete.

Përveç rreziqeve fizike, ekspozimi i gjatë ndaj ajrit të ftohtë ose erës së fortë mund të shkaktojë probleme me frymëmarrjen dhe infeksione të veshëve./Periskopi/