Akademik Qosja flet për arkivat: A mund të jenë arkivistë edhe mëkatarët edhe komprometuesit e historisë?
Akademiku Rexhep Qosja ka ndarë me popullin një pjesë të shkëputur nga një roman për arkivat në kohën e debatit për arkivat e UÇK-së.
Qeveria Kurti II ka pranuar të hapen arkivat shtetërore për Ushtrinë Çlirimtare të Kosovës [UÇK] në këmbim të hapjes së arkivave shtetërore të kohës së luftës nga Serbia.
Kurti është shprehur se pret të gjejë gjithçka në arkivat e Serbisë, por humanistja Natasha Kandiq është shprehur krejt ndryshe duke thënë se dosjet e krimeve mund të jenë te komandantët e luftës, përcjell Periskopi.
E Qosja nuk duket të përzihet fort në debatin në fjalë, thjesht duke dhënë vlerësime të përgjithshme për arkivat dhe arkivistët.
“Arkivat janë bodrumet e prishësive”, thotë ndër tjerash ai.
“Por, a mund të jenë arkivistët edhe mëkatarët e historisë, edhe komprometuesit e historisë?” – është fjalia që duket se denoncon Qeverinë Kurti II.
Postimi i plotë:
“Eh, arkivat! Sa të rëndësishëm e sa të rrezikshëm janë!
Arkivat janë magazinat e lavdive!
Arkivat janë bodrumet e prishësive!
Arkivat janë përcaktues të mendimeve të historisë!
Arkivat janë bibliotekat e historisë!
Arkivat janë enciklopeditë e historisë!
Arkivistët janë prokurorët e heshtur të historisë!
Arkivistët janë gjykatësit e heshtur të historisë!
Arkivistët janë dëshmorët e historisë!
Arkivistët janë heronjtë e historisë!
Qe, sa mirë, unë si përkthyes arkivist jam edhe dëshmor, edhe hero i historisë! Nuk jam ende, por duhet të bëhem edhe dëshmor, edhe hero i historisë!
Por, a mund të jenë arkivistët edhe mëkatarët e historisë, edhe komprometuesit e historisë?”
Nga romani “Të fshehtat e treguara” 2020
