Chelsea bën një hap prapa drejt Ligës së Kampionëve, ndalet në shtëpi nga Burnley
Chelsea ka marrë vetëm një pikë në “Stamford Bridge” ndaj Burnley dhe kështu, mund të humbasë pozitën e katërt, që dërgon në Champions League.
Chelsea ka barazuar 2-2 me Burnleyn në “Stamford Bridge”, sfidë e vlefshme për xhiron e 35 në Premierligë.
Të gjithë golat u shënuan për 22 minuta.
Të parët në epërsi kaluan mysafirët. Jeff Hendrick shënoi për 0-1 në minutën e 8’.
Por, vendasit reaguan furishëm, duke shënuar dy gola të shpejtë për të përmbysur gjithçka.
Fillimisht, në minutën e 12’, N’Golo Kante barazoi në 1-1 rezultatin, ndërsa në minutën e 14’, Gonzalo Higuain kaloi në epërsi Chelsean, duke shënuar për 2-1.
Por, pak minuta më vonë, në atë të 22’, Burnley e barazoi në 2-2 rezultatin ndaj “Bluve të Londrës”.
Ishte Ashley Barnes ai që shënoi për 2-2, që doli të jetë rezultati përfundimtar i ndeshjes, pasi deri në fund, pavarësisht rasteve, portat nuk u tundën më.
Me këtë barazim, Chelsea rrezikon të humbasë vendin e katërt. Ata tani kanë 67 pikë, një më shumë se Arsenali në pozitën e pestë e tri më shumë se Manchester United në pozitën e gjashtë.
Four goals shared. One point each today.#CHEBUR pic.twitter.com/2Oq6qWjZnL
— Chelsea FC (@ChelseaFC) April 22, 2019
