Demokracia e tretë më e madhe në botë në rrezik: Paralajmërohet puç ushtarak në Brazil

Periskopi.com Lajme

Presidenti i Brazilit, Jair Bolsonaro, me aleatët e tij mund të jenë duke përgatitur një puç ushtarak në Brazil, sipas një grupi me ndikim nga ish presidentët, kryeministrat dhe figurat e rëndësishme publike të së majtës.

Në një letër të hapur pretendohet që në tubimet që mbështetësit e Bolsonaros mbajtën të martën e kaluar u paraqit rrezik për demokracinë përmes një modeli të rebelit që kishin shfaqur mbështetësit e presidentit amerikan Donald Trump ndaj ndërtesës së Kapitolit [streha e Kongresit dhe Senatit] më 6 janar.

Ata vlerësuan marshet mbarë-kombëtare të mbështetësve të Bolsonaros kundër  gjykatës supreme dhe Kongresit, ku ishin përfshirë grupet supremaciste, policia ushtarake dhe figura publike të çdo niveli të qeverisjes, se po “rrisnin frikën për një puç ndaj demokracisë së tretë më të madhe në botë”.

Nënshkruesit përfshinë Jose Luis Rodriguez Zapateron – ish kryeministër i Spanjës, Yanis Varoufakisin – ish ministër i financave të Greqisë, Jeremy Corbynin – ish liderin Laborist në Britani, Fernando Lugon – ish presidentin e Paraguajit dhe të tjerë, raporton Guardian, përcjell Periskopi.

Ata theksuan që më 10 gusht, Bolsonaro “kishte drejtuar një paradë të paparë ushtarake në kryeqytet, Brasilia, derisa aleatët e tij në Kongres kishin bërë reforma të mëdha në sistemin elektoral të vendit.”

Presidenti kishte thënë vetë më 21 gusht se marshet ishin përgatitje për “kundër-puçin” ndaj Kongresit dhe Gjykatës Supreme.

Ai kishte deklaruar se “kushtetuta komuniste” e Brazilit kishte marrë pushtetin nga ai, dhe e kishte akuzuar “gjyqësorin, të majtën, dhe krejt aparatusin e interesave të fshehta” se po konspironin kundër tij.

Sipas sondazheve, 60 për qind e votuesve nuk do të votonin për Bolsonaron në zgjedhjet e vitit të ardhshëm. /Periskopi

Shpërndaje në: