Gjykatësi i EULEX-it: Ligji i Trepçës, antikushtetues
Dhoma e Veçantë e Gjykatës Supreme ka kërkuar nga Gjykata Kushtetuese që ta vlerësojë edhe një herë Ligjin për Trepçën duke pretenduar se ky ligj është anti- kushtetues.
Kërkesa ka ardhur nga gjykatësi i cili është duke e trajtuar padinë e debitorëve të Trepçës.
Siç shkruhet në njoftimin për shtyp të Dhomës së Veçantë gjykatësi i EULEX ka arritur në përfundim se ligji është antikushtetues.
Në arsyet për këtë gjykatësi ka përmendur faktin se Ligji e Shpronëson Trepçën pa asnjë kompensim i cili më pas mund të përdorej për kompensimin e kredimarrësit. Si arsye përmendet edhe fakti se shpronësimi kryhet në dobi të personave privat pa ndonjë arsyetim.
Para dy dite, Presidenti i vendit nënshkroi Ligjin për Trepçën i cili e bart këtë ndërmarrje në pronësi të Qeverisë së Kosovës dhe punëtorëve të saj.
Vendimi i presidentit erdhi pasi gjykata kushtetuese vlerësoi se ky ligj është miratuar në përputhje me Kushtetutën./Kallxo.com/
