Kurti premton votimin e Kodit Civil në Berlin, harron se kundërshtohet nga bashkëpartiakët e tij

Një nga projektligjet që po e përçanë partinë në pushtet Vetëvendosje, ai për Kodin Civil,  është bërë “mollë sherri”që mendimet e disa  deputetëve të jenë ndryshe nga partia e tyre. Kryeministri Kurti në një ngjarje të organizuar nga Partia Socialdemokrate e Gjermanisë në Berlin ka folur për këtë projektligj, i cili s’po kalon në Kuvend, e që parasheh hartimin e një ligji që do t’i lejonte “bashkësitë e regjistruara civile ndërmjet personave me sekse të njëjta”, shkruan Periskopi.

Për këtë nen, Kurti tha se është një ndër dy “gjërat që duhet të ndodhin” që Kosova të ketë sukses në kërkesën e saj për anëtarësim në Këshill të Europës.

Kryeministri në Berlin dha një zotim të fortë se do t’u ofrojë qytetarëve të  Kosovës të drejtën e bashkimeve civile të të njëjtës gjini.

Por Kurti duket se ka harruar që ka problem edhe me disa deputetë të partisë së tij, të cilët refuzojnë të japin votë pro për shkak të këtij neni. E për ta arritur këtë, ai po kërkon edhe votat e opozitës.

“Kosova do të synojë që së shpejti të bëhet vendi i dytë në Ballkanin Perëndimor, pas fqinjëve tanë Mali i Zi, duke u ofruar qytetarëve të saj të drejtën e bashkimeve civile të të njëjtës gjini. Ne do të punojmë shumë për ta kaluar këtë në të ardhmen shumë të afërt. Për këtë unë personalisht do të ndërtoj një shumicë parlamentare – dhe do të bëj thirrje për mbështetje të gjerë për këtë edhe nga partitë opozitare. Vendimi për mbledhjen e qeverisë për këtë çështje tashmë është marrë”.

Kurti tha se kjo do të bëhet meqë e kërkon që Gjykata Europiane e të Drejtave të Njeriut derisa kërkesa për anëtarësim të Kosovës në Këshill të Europës është në proces.

“Ne e bëjmë këtë sepse është një e drejtë, sepse është një e drejtë, sepse është në kushtetutën tonë dhe sepse e dimë që Gjykata Europiane e të Drejtave të Njeriut ka nxjerrë aktgjykime duke kërkuar që kjo të bëhet. Ne e dimë se ka vende në Këshillin e Europës për një kohë të gjatë që e kanë injoruar gjykatën për këtë. Kosova do të jetë ndryshe. Në këtë mënyrë duam të frymëzojmë të tjerët”, tha Kurti.

14 deputetë të Vetëvendosjes kishin votuar kundër Kodit Civil.

Deputetë të partisë në pushtet, nuk votuan pro këtij projekt-kodi, bile disa zgjodhën fjalët më ofenduese ndaj komunitetit LGBTI+./ALBINA ZARIQI-Periskopi