Ministri i jashtëm serb takon Lavrovin dhe i rrëfen për zhvillimet në veri
Ministri i Punëve të Jashtme të Serbisë Nikola Selakoviq e ka njoftuar homologun e tij rus Sergey Lavrov për zhvillimet e fundit në pjesën veriore të Kosovës.
“Ministri i Jashtëm Selakoviq i ka thënë ministrit të Jashtëm të Rusisë Lavrov në margjinat e Asamblesë së Përgjithshme të OKB-së se Serbia është mirënjohëse ndaj Rusisë për mbështetjen në forumet shumëpalëshe, veçanërisht në Këshillin e Sigurimit të Kombeve të Bashkuara dhe e ka informuar atë për zhvillimet e fundit në Kosovë; prodhimi i vaksinës Sputnik në Serbi gjithashtu u diskutua”, thuhet në cicërimën e ministrisë së Punëve të Jashtme të Serbisë.
Selakoviq dhe Lavrov janë takuar në margjinat e Asamblesë së Përgjithshme të OKB-së.
