Na kthehen 40 milionë: Themelorja anulon vendimin e ZRrE për pagimin e rrymës për serbët në Veri

Periskopi.com Lajme

Themelorja në Prishtinë e ka anuluar vendimin e ZrrE-së [Zyrës së Rregullatorit për Energji] që t’i paguhen faturat e energjisë elektrike katër komunave veriore në periudhën 2012-2017, pas ankesës nga Avokati i Popullit.

Për më shumë, Gjykata Themelore e ka detyruar KEDS-in të bëjë kthimin e mbi 40 milionë eurove për t’i kompensuar dëmin konsumatorëve të cilët janë faturuar për shpenzimin e energjisë elektrike në katër komunat veriore të Kosovës.

“Anulohet si i kundërligjshëm vendimi i ZRRE-së dhe detyrohet që të ndërmarr veprime që e obligojnë Shërbimin e Shpërndarjes së Energjisë Elektrike në Kosovë (KEDS) që të bëjë kthimin e shumës së faturuar, respektivisht kompensimin e dëmit konsumatorëve të cilët janë faturuar për shpenzimin e energjisë elektrike në katër komunat veriore të Kosovës dhe atë për periudhën kohore nga 06.02.2012 e deri më 20.10.2017, në vlerën prej 40.855.480 milionë euro. Të gjitha këto në afat prej 15 ditësh nga dita e pranimit të këtij aktgjykimi”, thuhet në njoftimin e Gjykatës.