Natë magjike në Paris: Messi gol spektakolar, nënshtrohet Man City
Paris Saint-Germaini e ka mposhtur (2-0) kundërshtarin kryesor në Grupin A, Manchester Cityn, duke marrë primatin në këtë grup në Ligën e Kampionëve.
Rezultati u zhbllokua në minutën e tetë, kur Neymar nuk arriti ta godiste një top në zonë që shkoi drejt Idrissa Gueye dhe ky i fundit e nguliti në rrjetë.
Në vazhdim të gjysmës së parë, skuadra mysafire filloi ta kërkonte golin e barazimit dhe rrezikoi përmes Bernardo Silva dhe Raheem Sterling.
Nikoqirët u rikthyen me dy shanse të krijuara nga Kylian Mbappe, i cili vendosi të pasonte për bashkëlojtarët e që nuk u konkretizuan.
Në gjysmën e dytë, skuadra angleze bëri presion për ta barazuar rezultatin me disa tentativa për të shënuar. Por, erdhi goli që të gjithë e kishin pritur.
Derisa PSG ishte në epërsi dhe City bënte presion, reagimi i Lionel Messit ishte i mrekullueshëm, ndërsa goditja e superyllit argjentinas u ndal në rrjetë (74’).
Falë kësaj fitoreje, Paris Saint-Germaini ngritët në krye të Grupit A me katër pikë, ndërsa Manchester City mbetet në kuotën e tri pikëve.
