Një marrëveshje miliardëshe trondit botën e teknologjisë
OpenAI, kompania që qëndron pas ChatGPT-së, ka nënshkruar një marrëveshje miliardëshe me Amazon.
Në kuadër të saj, OpenAI do të mund të përdorë në të ardhmen qendrat gjigante të të dhënave të Amazon-it në SHBA për të operuar sistemet e saj të inteligjencës artificiale. Këtë e bëjnë të mundur “qindra mijëra” çipa të specializuar të prodhuesit Nvidia, të cilët do të ofrohen përmes Amazon Web Services (AWS). Këta procesorë grafikë janë të domosdoshëm për funksionimin e inteligjencës artificiale dhe të mësimit makinerik.
OpenAI zhvendoset te Amazon
OpenAI ka blerë kapacitetet e nevojshme për një shumë marramendëse prej 38 miliardë dollarësh (rreth 33 miliardë euro), dhe marrëveshja do të zgjasë shtatë vjet, raporton BILD, transmeton Periskopi.
Reagimi në tregjet financiare ishte i menjëhershëm: pas njoftimit të marrëveshjes, aksionet e Amazon-it u rritën me plot 4 për qind.
Megjithatë, OpenAI nuk do ta përdorë fuqinë llogaritëse vetëm për zhvillime të reja, por edhe për funksionimin e përditshëm të sistemeve ekzistuese.
Aktualisht, chatboti ChatGPT numëron më shumë se 800 milionë përdorues në javë.
