“Padia për gjenocid në KiE”, Blerta Deliu i reagon Albulena Haxhiut: Po provon t’i manipuloj qytetarët

Deputetja e PDK-së, Blerta Deliu ka reaguar ndaj deklaratës që ka dhënë ministrja e Drejtësisë, Albulena Haxhiu e cila ka thënë se pas pranimit të Kosovës në Këshillin e Evropës, Kosovës i hapet rrugë për padi për gjenocid ndaj Serbisë.

Ajo ka theksuar se kjo fatkeqësisht nuk është e vërtetë.

“ Vetëm një shtet anëtar i OKB-së mund të bëjë një padi të tillë në Gjykatën Ndërkombëtare të Drejtësisë”, ka shkruar ajo.

Postimi i plotë:

Ministrja Haxhiu edhe një herë paska provuar t’i manipuloj qytetarët. Po thotë se pas pranimit në Këshill të Evropës, Kosovës i hapet rrugë për padi për gjenocid ndaj Serbisë. Kjo, fatkeqësisht, nuk është e vërtetë. Vetëm një shtet anëtar i OKB-së mund të bëjë një padi të tillë në Gjykatën Ndërkombëtare të Drejtësisë.

Tani, janë dy arsye pse Ministrja Haxhiu bënë këso lojëra fjalësh: E para, për të larguar vëmendjen nga themelimi i Asociacionit – që po bëhen gati ta bëjnë. Dhe, e dyta por jo më pak e rëndësishme, për të “realizuar” gjoja një premtim elektoral, sikur ai për padinë për gjenocid ndaj Serbisë.

Keni thënë nuk do ta bëjmë Asociacionin – po e bëni. Keni thënë do të bëjmë padi për gjenocid ndaj Serbisë – nuk po e bëni. Këta jeni ju!