Polonia: Raketa që goditi një fshat kufitar në 2022 ishte ukrainase
Raketa që ra në nëntor 2022 në fshatin polak Przewodow, pranë kufirit me Ukrainën, duke vrarë dy persona, ishte ukrainase dhe jo ruse, konfirmoi të enjten ministria e drejtësisë e Polonisë.
Raketa ra pranë një shkolle, vetëm 6 kilometra nga kufiri me Ukrainën.
“Hetimi nga prokurorët polakë çoi në përfundimin unanim se raketa ishte ukrainase”, tha Zbigniew Ziobro, Prokurori i Përgjithshëm i Polonisë. “Duke marrë parasysh se nga është gjuajtur dhe nga cila njësi ushtarake, ishte një raketë ukrainase”, shtoi ai, duke sqaruar se raketa ishte “sovjetike, e prodhimit rus”.
Ziobro në të njëjtën kohë shprehu keqardhjen e tij sepse “prej muajsh nuk ka asnjë bashkëpunim për rastin” nga ana e Kievit.
Rënia e raketës në fshat ngriti shqetësimet për një përshkallëzim të mundshëm të luftës në Ukrainë, me përfshirjen e NATO-s, anëtare e së cilës është Polonia.
Ziobro nuk donte të fajësonte askënd për këtë episod. Megjithatë, partia e ekstremit të djathtë, anti-evropiane dhe anti-ukrainase kërkoi që Kievit t’i kërkohet të paguajë “reparacione”.
