Rasti “Reflektori”, Prokuroria Speciale ngre aktakuzë kundër gjashtë personave
Prokuroria Speciale ka njoftuar se ka ngritur aktakuzë kundër gjashtë personave në rastin “Reflektori” – L.T, O.V, I.M, M.H, SH.D dhe F.K.
Prokuroria njofton se të pandehurit L.T, O.V dhe I.M së bashku me të pandehurin M.I. i cili gjendet në arrati, duke vepruar në grup kanë kryer veprën penale “Blerja posedimi shpërndarja dhe shitja e paautorizuar e narkotikëve, substancave psikotrope ose analoge”.
“Të pandehurit M.H, SH.D dhe F.K akuzohen se kanë kryer veprën penale ndihmë në kryerjen e veprës penale “Blerja, posedimi, shpërndarja dhe shitja e paautorizuar e narkotikëve, substancave psikotrope ose analoge” nga neni 267 paragrafi 2 lidhur me nenin 275 paragrafi 1 nënparagrafi 1.1 dhe 1.9 lidhur me nenin 33 të KPRK-së. Ndërkaq, të pandehurit L.T dhe O.V akuzohen edhe për veprën penale “Mbajtja në pronësi, kontroll ose posedim të paautorizuar të armëve” nga neni 366 paragrafi 1 të KPRK-së.”
Ky rast ka të bëje me aksionin e koduar “Reflektori” dhe lidhet me drogën që ishte kapur në pikën kufitare Hani i Elezit, në muajin shkurt të viti 2022.
Atë kohë policia e prokuroria patën njoftuar zyrtarisht se janë kapur 83 kg 592 gramë heroinë në pikën kufitare në Han të Elezit. Në mesin e të arrestuarve kishte edhe shtetas turk.