Shqiptarët në Finlandë: Kosovarja e plagosur atje është 12-vjeçare nga Mitrovica
Një grup i shqiptarëve të Kosovës në Finlandë kanë njoftuar se vajza nga Kosova që u plagos në Vanta të Finlandës është nga Mitrovica dhe e moshës 12-vjeçare.
Kështu thuhet në një postim në grupin e shqiptarëve atje në ‘Facebook’, duke sqaruar se ajo po vazhdon të jetë në intenzivë.
“Vajza 12-vjeçare nga Mitrovica është ende duke luftuar për jetën. Pas operacionit të gjatë e të vështirë, ajo vazhdon të jetë nën vëzhgimin intensiv të mjekëve në Helsinkit (HUS), e rrethuar nga aparaturat e shumta jetëdhënëse”, thuhet në postimin e adminit të grupit, raporton Insajderi.
“Pavarësisht gjëndjes tepër të rëndë shëndetësore të vajzës, Familja dhe i gjithë Komuniteti Shqiptar në Finlandëakoma shpresojnë mbijetimin e saj”, vijon postimi.
Për plagosjen e 12-vjeçares nga Mitrovica në Finlandë ka bërë të ditur Ministria e Punëve të Jashtme të Kosovës.
“Në lidhje me ngjarjen tragjike që ndodhi sot në qytetin Vanta, respektivisht shkollën Viertola, ku u vra një person dhe dy të tjerë u plagosën, Ministria e Punëve të Jashtme dhe Diasporës nëpërmjet Ambasadës së Republikës së Kosovës në Stokholm ka arritur që të konfirmojë nga familjarët se në mesin e të plagosurve është edhe një vajzë shqiptare nga Kosova”, thuhet në njoftim.
Në njoftim thuhet se Ambasada e Kosovës në Stokholm është në kontakt të vazhdueshëm me autoritetet vendase dhe me familjen e vajzës së plagosur dhe ka ofruar ndihmën e saj sipas udhëzimeve të pranuara nga MPJD.
