ShSKUK-ja gjobit 70 operatorë ekonomikë

Shërbimi Spitalor Klinik Universitar i Kosovës (ShSKUK), ka njoftuar se për gjashtë mujorin e parë të vitit ka gjobitur 70 operatorë ekonomik me shuma të penalltive të ndryshme, por që gjithsej vlera e tyre arrin në 76 mijë e 406 euro.

ShSKUK-ja ka publikuar listën e përfituesve, të cilët pastaj janë dënuar për vonesën e produkteve në afatin e paraparë me kontratë për vitin 2025 për gjashtë mujorin e parë.

Ky institucion shëndetësor mund t’i dënojë operatorët ekonomik (OE) për arsye të ndryshme që lidhen me mosrespektimin e kushteve të kontratës së nënshkruar mes tyre.

Disa arsye të zakonshme për këto dënime përfshijnë mosrespektimin e afateve të dorëzimit nëse OE nuk e furnizon ShSKUK-në me produkte ose shërbime brenda afateve të përcaktuara në kontratë, raporton AP, transmeton Periskopi.

Në rastet kur produktet ose shërbimet e ofruara nuk përmbushin standardet ose specifikimet e kontraktuara, nëse operatori ekonomik nuk e plotëson tërësisht obligimin për të furnizuar mallra ose shërbime sipas sasisë dhe specifikimeve të kërkuara.

Po ashtu nëse ka shkelje të cilat lidhen me kontratën, si mungesa e dokumentacionit të nevojshëm ose mospërmbushja e detyrimeve financiare.

ShSKUK-ja mund të shqiptojë gjobë edhe në rastet kur vonesat ose mungesat e furnizimeve shkaktojnë rrezik për pacientët ose pengesa në funksionimin normal të shërbimeve spitalore.

Albanian Post kishte raportuar për mungesën e injeksionit kryesor për të trajtuar çrregullimin e trombociteve, për të cilën Ministria e Shëndetësisë kishte thënë se fajtorë janë operatorët ekonomikë.

Kjo pasi që ndonëse e njëjta gjendet në Listën Esenciale të Barnave – e njëjta po ashtu s’mund të gjendet në treg./Periskopi/