Si manipuloi kryeministri Mustafa për vizitën te Familja Jashari?

Kryeministri Isa Mustafa arsyetoi mosvizitën e tij në Familjen Jashari, me një vizitë të bërë tre apo katër ditë pas ngjarjes në Prekaz, që ai ia kishtë bërë Rifat Jasharit në Gjermani.

Madje ai thotë, se me Rifat Jasharin do të takohet në ‘rrethana tjera’ kinse për të biseduar për shtet-ndërtimin.

Por pa kaluar shumë kohë, Mustafën e ka demantuar një aktiviste e LDK’së, Donika Gërvalla.

Ajo shkruan në Facebook:

“Është shumë për t’u shqetësuar paaftësia e Isa Mustafës për ta përballuar të vërtetën dhe shkarja e tij në gënjeshtra krejtësisht të pakuptimta për çështje, të cilat shumë lehtë mund të vërtetohen. E pamja në Mynih në mars të vitit 1998 tek Rifat Jashari jo vetëm që është mbajtur, por ajo ka zgjatur me ditë të tëra. Sali Çekaj për shembull nuk ka munguar as një ditë të vetme në këtë t’pame, gjatë së cilës Baci Rifat priti e përcolli me mijëra shqiptarë nga e gjithë bota”, shkruan Gërvalla.

“Pse shpik Isa Mustafa gjëra të paqena në një ditë kaq të rëndë por edhe krenare në vetëdijen kolektive shqiptare në Kosovë? E din Isa Mustafa mirë, por e dimë edhe ne të gjithë që në atë kohë ishim në Gjermani, pse nuk troket në derë të Rifat Jasharit. Prandaj Isa Mustafa, thuaje të vërtetën ose hesht më mirë! Sa e neveritshme kjo mungesë totale e moralit dhe e përgjegjësisë”, ka shtuar ajo më tej.