Specialja konfirmon që kanë kërkuar nga Policia e Kosovës, që të garantojnë lirimin me kusht të ish-krerëve të UÇK’së

Periskopi.com Lajme

Dhomat e Specializuara të Kosovës në Hagë, që në diskursin publik quhet Gjykata Speciale, ka kërkuar nga Policia e Kosovës që brenda dy javësh të ofrojë informacione në lidhje me autorizimet dhe kapacitetet e saj për të zbatuar kushtet që kanë të bëjnë me lirimin e përkohshëm të mundshëm nga paraburgimi të drejtuesve të UÇK-së, të akuzuar për krime lufte, të cilët po mbahen në paraburgim në Hagë.

Këtë e ka konfirmuar zyra për marrëdhënie me publikun, në kuadër të Gjykatës Speciale.

Në përgjigjen e tyre, bëhet e ditur se gjykatësi i procesurës paraprake ka kërkuar nga Policia e Kosovës që të ofroj informacion lidhur me: (i) autorizimet dhe kapacitetet e Policisë së Kosovës për të kufizuar lëvizjet e individëve që i nënshtrohen lirimit të përkohshëm, monitorimin dhe kufizimin e komunikimeve të këtyre individëve, administrimin e arrestit shtëpiak dhe zbatueshmërinë e kushteve që kanë të bëjnë me lirimin e përkohshëm; dhe (ii) rastet e mëparshme të zbatimit të kushteve që kanë të bëjnë me lirimin e përkohshëm ose mbajtjen në paraburgim të personave të akuzuar për krime të rënda.

Mirëpo, në përgjigjen e tyre, nuk specifikohet se a kanë marrë përgjigje nga ana e Policisë së Kosovës, lidhur me garantimin apo jo të lirimit të ish-krerëve të Ushtrisë Çlirimtare të Kosovës.

“Urdhri i gjykatësit të procedurës paraprake është lëshuar më 8 tetor, në gjuhën angleze, dhe ai specifikon se informacioni duhet të ofrohet brenda dy javësh nga njoftimi i përkthimit të këtij urdhri në gjuhën shqipe. Në urdhrin e tij, gjykatësi i procedurës paraprake kërkon nga Policia e Kosovës që të ofroj informacion lidhur me: (i) autorizimet dhe kapacitetet e Policisë së Kosovës për të kufizuar lëvizjet e individëve që i nënshtrohen lirimit të përkohshëm, monitorimin dhe kufizimin e komunikimeve të këtyre individëve, administrimin e arrestit shtëpiak dhe zbatueshmërinë e kushteve që kanë të bëjnë me lirimin e përkohshëm; dhe (ii) rastet e mëparshme të zbatimit të kushteve që kanë të bëjnë me lirimin e përkohshëm ose mbajtjen në paraburgim të personave të akuzuar për krime të rënda. Urdhri gjithashtu përmban një aneks konfidencial me detaje të mëtejshme.”, thuhet në përgjigjen nga Gjykata Speciale për Gazeta Blic.

Në anën tjetër, deputetja dhe anëtarja e Komisionit nga radhët e Lëvizjes Vetëvendosje, Shqipe Mehmeti-Selimi, ka pyetur drejtorin e Policisë, Samedin Mehmeti, rreth kësaj çështjeje.

“Besoj opinioni publik e di se na është bërë kërkesa nga avokatët mbrojtës, ndërsa këtë pyetje drejtojeni te Dhomat e Specializuara”, tha Mehmeti.

Në anën tjetër, anëtarja e Komisionit insistoi në pyetje, por që drejtori iu lut që ta kursente për këtë çështje.

“Ne kemi dërguar kapacitetin dhe aftësinë tonë rreth mundësisë për me siguru lirinë me kusht. Ndërsa sa i përket pyetjes së Dhomave të Specializuara, kisha pas qef me na kursy dhe atë pyetje me ua bë atyre”, përfundoi sot deputetja Selimi – Mehmeti.

Shpërndaje në: