Periskopi

“Të ndërpriten seancat…”, Ramush Haradinaj publikon kërkesën e AAK’së në Gjykatën Kushtetuese

12 May, 11:23

Kreu i AAK’së, Ramush Haradinaj ka reaguar pasi partia e tij me mbështetjen edhe të deputetëve të LDK’së dhe PDK’së, i është drejtuar sot Gjykatës Kushtetuese, siç thonë ata, “për të saktësuar shkeljet kushtetuese në këtë proces [të Kuvendit] dhe për të na dhënë zgjidhje se si të dalim nga ky ngërç, transmeton Periskopi.

Haradinaj bën të ditur se ndër të tjera kanë kërkuar masë të përkohshme që të ndërpriten seancat parlamentare deri në një vendim të GJ.Kushtetuese.

Postimi i plotë i z. Haradinaj:

Loja me moskonstituimin e Kuvendit të Kosovës, është bërë e turpshme, jo vetëm për deputetët e zgjedhur nga populli, por edhe për vetë Kosovën si shtet. Seancat e përsëritura në çdo 48 orë, pa asnjë vendim, janë bërë model i papjekurisë sonë shtetërore.

Dëmet nga bllokada që po i bëhët konstituimit të Kuvendit, ka edhe pasoja të rënda politike dhe ekonomike për ne si vend e si shoqëri. Konsiderojmë se ndërrimi i mënyrës së votimit në gjysmë të procesit, me diktat të Vetëvendsjes, është shkelje e rëndë e Kushtetutës.

Në një situatë të tillë pa rrugëdalje, e vetmja derë na ka mbetur Gjykata Kushtetuese. Prandaj sot, Grupi ynë Parlamentar me mbështetjen edhe të deputetëve të LDK dhe të PDK, i është drejtuar asaj për të saktësuar shkeljet kushtetuese në këtë proces dhe për të na dhënë zgjidhje se si të dalim nga ky ngërç.

Natyrisht deri në një vendim të Gjykatës Kushtetuese, i cili shpresojmë të jetë i shpejtë, kemi kërkuar masë të përkohshme që të ndërpritet shpërfytyrimi i Parlamentit me seancat qesharake e pa asnjë produkt!

Shpërndaje në: