“U vranë para derës së shtëpisë” – Krejt çka dihet për vrasjen e dy vëllezërve nga burri i motrës në Malishevë

Erdhën nga gurbeti për t’i dhënë lamtumirën e fundit babait, por Naim dhe Driton Morina dy vëllezër nga fshati Gollubovc i  Malishevës, u vrarë sot nga burri i motrës së tyre, Astrit Isufi, shkruan Periskopi.

Lajmin për vrasjen e dy vëllëzërve e ka konfirmuar për Periskopin, zëdhënësi i Policisë për rajonin e Gjakovës Sheremet Elezaj.

“Rreth orës 11:30, jemi njoftuar se dy persona të gjinisë mashkullore, të moshës madhore (vllezër), janë dërguar në QMF-në e Kijevës si pasojë e plagëve të marra nga arma e zjarrit në fshatin Golluboc të Malishevës. Personeli mjekësor në QMF ka konstatuar vdekjen e viktimave. Njësitë e nevojshme policore i janë përgjigjur menjëherë rastit dhe kanë dalë në vendin e ngjarjes. Lidhur me rastin, deri më tani është identifikuar një person i dyshuar, gjithashtu mashkull i moshës madhore. Në koordinim me prokurorin e shtetit, janë duke u ndërmarrë të gjitha veprimet e nevojshme hetimore lidhur me rastin dhe arrestimi”, tha Elezaj për Periskopin.

Sipas raportimeve të dy viktimat ishin mërgimtarë që kishin ardhur nga jashtë për t’i dhënë lamtumirën e fundit babait të tyre, i cili kishte ndërruar jetë para pak ditësh.

“Para 4 dite jane ardhe ne Kosove nga gurbeti, se kane pase rast vdekje iu ka vdek baba”, tha ky burim për Insajderin.

Si ndodhi ngjarja tronditëse?

Sot, në momentin kur ende po vinin njerëz për ngushëllim, i dyshuari ka shkuar për ta marrë bashkëshorten. Pasi është larguar disa metra nga oborri, është kthyer përsëri dhe ka shtënë me armë zjarri ndaj dy vëllezërve që qëndronin para derës së shtëpisë.

Të dy kanë ndërruar jetë në vend.

“E pamja ishte kryer para tre ditësh, por ende vinin njerëz për me ngushëllu. Ai erdhi për me e marrë gruan, u kthye dhe i vrau në prag të shtëpisë. Kjo ta këputë shpirt. Edhe babën para pak ditësh e kemi pas varrosë,” ka thënë një i afërm i familjes, për Sinjalin.

Në vendin e ngjarjes tashmë kanë dalur një numër i madh i Policëve, ndërsa të pranishëm janë edhe kryeprokurori dhe prokurori i rastit, kanë thënë nga Prokuroria Themelore.

Ndërsa i dyshuari për vrasjen e miqve të tij Astrit Isufi, nga fshati Sankovc i Drenasit ndodhet ende në arrati, në kërkim të tij është vënë edhe njësiti K9 i Policisë.

Isufi është emër i njohur për organet e rendit, kjo është konfirmuar për klankosovën nga Prokuroria Themelore në Prishtinë.

Astrit Isufi ka qenë i dyshuar për dy vepra penale që janë “Dhunë në familje dhe kanosje”.

“Lidhur me pyetjen tuaj ju njoftojmë, se prokurori i shtetit ndaj personit te dyshuar A.I., me datë 06.04.2025, është paraqitur kërkesa për caktimin e masës se paraburgimit, e cila po të njëjtit iu është caktuar nga gjykata kompetente. Po ashtu, me datë 07.04.2025, Prokuroria Themelore në Prishtinë, ka ngritur aktakuzë ndaj të pandehurit për veprat penale “Dhune ne familje sipas nenit 248 të Kodit penal të Republikës së Kosovës, dhe “Kanosje” sipas nenit 181 te KPRK-se”, thuhet në njoftimin e Prokurorisë.

Sipas Express gruaja e të dyshuarit, përkatësisht motra e viktimave, ka qenë në veturën e të dyshuarit kur ka ndodhur rasti.

Lidhur me rastin para disa minutave ka dhënë detaje edhe Kryeprokurori i Prokurorisë Themelore në Gjakovë, Enis Gashi.

Ai para gazetarëve tha se ende nuk dihet saktë motivi i vrasjes dhe se i dyshuari ndodhet ende në arrati.

“Sikurse jeni njoftuar deri më tani kemi të bëjmë me një vrasje të rënd, vrasje të dyfishtë ku kemi të bëjmë me dy viktima. Kryesi i kësaj vepre penale është ende në arrati dhe policia bashkë me prokurorinë është duke ndërmarrë të gjitha masat që sa më shpejt të identifikohet dhe të sigurohet prezenca e tij”, tha ai para gazetarëve.

Deri tani janë shoqëruar në stacion policor disa persona që janë intervistuar në cilësinë e dëshmitarëve, në mesin e tyre edhe familjarë të viktimave./PERISKOPI/

Raportohet se ky është i dyshuari për vrasjen e dyfishtë në Golluboc të Malishevës

Publikohet foto e të dyshuarit për vrasjen e dy vëllëzërve të gruas së tij në Malishevë

Vrasja e dyfishtë në Malishevë, Kryeprokurori: Kryesi është ende në arrati

Policia në kërkim të dyshuarit për vrasjen e vëllezërve në Malishevë, aktivizon Njësinë K9 – pamje

Këta dyshohet të jenë dy vëllezërit që u vranë nga dhëndrri në Gullbovc të Malishevës

Vrasje e dyfishtë në Gullbovc të Malishevës