Zyrtare – Osmani fton liderët e partive politike: Presidenca thotë se po presin konfirmimet

Presidentja e Kosovës, Vjosa Osmani, do të nisë konsultime lidhur me konstituimin e Kuvendit, raporton Periskopi.

Këtë e kanë bërë të ditur për Periskopin nga vet Presidenca, derisa thanë se ftesat janë dërguar dhe po i presin konfirmimet.

“Presidentja Osmani do të fillojë një seri konsultimesh rreth çështjes së konstituimit të Kuvendit nga data 15 maj. Ftesat tashmë janë dërguar për takimet e para dhe po presim konfirmimet”, e konfirmoi Bekim Kupina nga Presidenca.

Ky takim vjen pas shprehjes së gatishmërisë së Presidentes Osmani për të pritur liderët e të gjitha partive politike në një takim gjithëpërfshirës, nëse ata e konsiderojnë të nevojshëm një angazhim të tillë.

“Presidentja e Republikës së Kosovës, Vjosa Osmani, tashmë ka shprehë gatishmërinë e plotë, që nga data 16 prill, që t’i presë liderët e partive politike në rast se ata e shohin të nevojshme një gjë të tillë. Deri dje nuk kemi pasur një kërkesë të tillë. Tani që disa parti kanë kërkuar që Presidentja t’i thërrasë në takim të përbashkët të liderëve, Kabineti i Presidentes do të kontaktojë së shpejti me partitë politike për të parë se cila është koha e përshtatshme për të gjithë, për një takim të tillë gjithëpërfshirës”, kështu ishte bërë e ditur para disa ditësh nga zyra e Presidentes.

Tre muaj pas zgjedhjeve të 9 shkurtit, Kosova vazhdon të jetë pa Kuvend funksional, pasi deputetët kanë dështuar trembëdhjetë herë radhazi deri tani ta konstituojnë Kuvendin e ri.

Ndryshe, të dielën është zhvilluar seanca e 14-të me qëllim të konstituimi, por as këtë herë nuk përfundoi me sukses.

Seanca e radhës do të mbahet më 13 maj, të martën./Periskopi/

Vjosa Osmani lë “pending” kërkesën e disa partive për zhbollkim të ngërçit, seanca e nesërme veç një reprizë tjetër