92-vjeçari Paul Biya siguron mandatin e tetë presidencial në Kamerun

Presidenti 92-vjeçar i Kamerunit, Paul Biya, është rizgjedhur për mandatin e tij të tetë radhazi, duke forcuar pushtetin pas më shumë se katër dekadash në krye të shtetit. Rezultati zyrtar prej 53.7% të votave u shpall nga Këshilli Kushtetues, ndërsa sfiduesi i tij kryesor, Issa Tchiroma Bakary, mori 35.2%.

Fitorja e Biyas u prit me zhgënjim dhe ndjenjë boshllëku nga opozita dhe qytetarët që kishin shpresuar për ndryshim. Vendimi i tij për të kandiduar përsëri, pas 43 vjetësh në pushtet, ka ngjallur debate të mëdha në një vend që përballet me kriza të brendshme dhe tensione të theksuara në rajonet anglishtfolëse.

Stili i tij i qeverisjes – i mbyllur dhe i distancuar, shpeshherë nga jashtë vendit – ka krijuar pasiguri mbi drejtimin real të shtetit. Biya, që shpesh qëndron për periudha të gjata në Gjenevë, rrallëherë mban mbledhje të kabinetit ose flet publikisht për çështje të rëndësishme, raporton BBC.

Pavarësisht moshës dhe mungesës së transparencës, presidenti ka ruajtur pushtetin falë kontrollit të fortë mbi strukturat shtetërore dhe mungesës së një pasardhësi të qartë politik. Në radhët e opozitës, zhgënjimi është thelluar pas njoftimeve për përplasje me forcat e sigurisë në qytetet Douala dhe Garoua pas shpalljes së rezultateve.

Analistët theksojnë se mandati i tetë i Biyas mund të sjellë tensione të reja politike dhe sociale, pasi shumë qytetarë ndihen të lodhur nga një sistem që ofron “zgjedhje shumëpartiake, por pak shpresë për ndryshim.