Brukseli iu dërgon ftesa për takim Prishtinës dhe Beogradit

Periskopi.com Lajme

Përmes një komunikate, BE-ja konfirmon se ka ftuar Kosovën dhe Serbinë të shkojnë për takim në Bruksel, pas tensioneve të një nate më parë ne veriun e Kosovës.

Bashkimi Evropian ka dalë me një reagim një ditë pasi në veri të Kosovës u tensionua situata, për shkak të vendimit të Qeverisë për të zbatuar reciprocitetin me targa dhe me dokumente të lëshuara nga Serbia.

BE-ja ripërsërit se ideja për pezullimin e vendimit për targat dhe dokumentet ka qenë e Përfaqësuesit të Lartë evropian, Joseph Borell. Pas kësaj, njofton zyra për shtyp e BE-së, palët janë ftuar për takim të ndërmjetësuar në Bruksel.

“Pas pranimit nga Kosova të kërkesës së Joseph Borrell dhe SHBA-së për të shtyrë masat e planifikuara në lidhje me targat dhe kartat e identitetit, me kusht që të hiqen të gjitha barrierat, BE-ja ftoi të dyja palët të takohen në Bruksel për të diskutuar rrugën përpara”, thuhet në komunikatë.

Para kësaj, Brukseli qortoi Qeverinë që “bëri aksion të njëanshëm” por edhe serbët që bllokuan rrugët.

“Të gjithë të përfshirët duhet të qëndrojnë të qetë dhe çdo veprim i pakoordinuar dhe i njëanshëm që rrezikon stabilitetin dhe sigurinë në terren dhe pengon lirinë e lëvizjes së të gjithë qytetarëve duhet të ndalet menjëherë”, thuhet në njoftimin e BE-së.

Më herët, Radio Evropa e Lirë, raportoi duke u thirrë në burime, se z.Borrell ka ftuar Kurtin dhe Vuçiqin për takim në Bruksel, por kryeministri Kurti tha se deri tani, nuk e ka një ftesë të tillë. Mirëpo, Kurti e tha këtë deklaratë, rreth orës 13, në konferencën për media me ministrin Sveçla dhe deri tani, ftesa mund t’i ketë arritur.

Me presidentin e Serbisë është dashur të takohemi në Bruksel më 19 korrik. Ai ka kërkuar të shtyhet, mbase ka qenë duke përgatitur atë që ndodhi dje. Unë kam shprehur gatishmërinë, që kur të na thërret Borrell, zëvendëspresidenti i KE-së, do të shkoj në Bruksel, një ftesë të tillë deri në këto momente nuk e kemi. Në momentin që do ta kemi, do ta bëjmë publike dhe do ta shprehim qëndrimin tonë”, tha Kurti./Periskopi