Deliu kritikon Qeverinë për mosmenaxhimin e pandemisë, kërkon nga deputetët që urgjentisht të ndërpresin pushimin
Deputetja nga radhët e Partisë Demokratike të Kosovës, Blerta Deliu-Kodra ka kërkuar nga deputetët e Kuvendit që të ndërprejnë pushimin dhe t’i kthehet urgjentisht punës, në mënyrë që të detyrojnë Qeverinë për të ndërmarrë veprime në menaxhimin e pandemisë.
Deliu-Kodra ka thënë se deputetët duhet të iniciojnë formimin e një Komisioni Hetues për të hetuar arsyet dhe shkaqet e mosveprimit të Qeverisë ndaj paralajmërimeve të profesionistëve për rrezikun potencial të përhapjes së infeksionit me variantin Delta.
“Po ashtu, Kryeministri dhe ministritë kompetente duhet t’u dëshmojnë deputetëve nëse masat e ndërmarra së fundit janë të analizuara, nëse janë përllogaritur pasojat dhe është planifikuar mënyra dhe forma e rikuperimit si dhe është parashikuar efekti final i këtyre masave”, ka shkruar ajo.
Njoftimi i plotë:
Duke parë mungesën totale të përgjegjësisë nga Qeveria ndaj situatës alarmante me pandeminë, institucioni më i lartë përfaqësues dhe mekanizimi që mbikqyrë dhe mbanë përgjegjës Qeverinë, Kuvendi i Kosovës, duhet të ndërprejë pushimin dhe t’i kthehet urgjentisht punës për ta detyruar Qeverinë të ndërmarrë veprime në menaxhim të pandemisë. Nëpërmjet debatit parlamentar të nxirren konkluzione për veprimet konkrete dhe të shpejta që duhet ndërmarrë Qeveria dhe t’i kërkohet në mënyrë ultimative t’i realizojë ato.
Gjithashtu, deputetët duhet të inicojnë formimin e një Komisioni Hetues për të hetuar arsyet dhe shkaqet e mosveprimit të Qeverisë ndaj paralajmërimeve të profesionistëve për rrezikun potencial të përhapjes së infeksionit me variantin Delta të virusit duke kanosur drejtpërdrejt jetën e qytetarëve dhe shëndetin e përgjithshëm publik.
Po ashtu, Kryeministri dhe ministritë kompetente duhet t’u dëshmojnë deputetëve nëse masat e ndërmarra së fundit janë të analizuara, nëse janë përllogaritur pasojat dhe është planifikuar mënyra dhe forma e rikuperimit si dhe është parashikuar efekti final i këtyre masave.
Për fund, sikur Kryeministri të kishte vullnetin dhe energjinë për t’i inkurajuar masat të vaksinohen sikur i mobilizon ato në fushata linçuese, do të kishim një statistikë optimiste të të vaksionuarve.
