I tha referit ‘papak’ e lojtarit të Dritës ‘zezak’, baba i futbollit kosovar kërkon të hyjë në Librin e Genisit pas dënimit nga FFK
Komisioni Disiplinor i shkallës së parë në përbërje; Dukagjin Zefi – kryetar dhe Luan Salihu e Avni Shala anëtarë, në mbledhjen e mbajtur me datë 15.02.2019 shqyrtoi procedurën e hapur disiplinore nga mbledhja e kaluar lidhur me rastin e sjelljeve josportive të kryetrajnerit të KF “ Vëllaznimi” gjatë ndeshjes së Kupës së Kosovës, Vëllaznimi – Drita e zhvilluar me datë 10.02.2019 në stadiumin e qytetit në Gjakovë.
Pas sjelljeve protestuese ndaj gjyqtarit në çerekfinale, Munishi është dënuar me një shumë të hollash prej 1500 euro.
Federata e Futbollit të Kosovës i ka shqiptuar këtë vendim me një afat pagese deri në 15 ditë.
Trajneri i shumë skuadrave kosovare ka të drejtë ankese në afat kohor prej tetë ditësh.
Pas këtij vendimi, Munishi ka reaguar përmes rrjetit social, Facebook, duke ironizuar paksa me vendimin e FFK-së.
“Me këtë dënim, i fitoj 150 mijë euro nga Libri i Rekordeve, “Guiness”. Jam në fitim 148500 euro, duke mos i llogaritur zhiletat”, shkroi Munishi.
Kujtojmë që Munishi e kishte quajtur ‘papak’ gjyqtarin me anë të një postim në Facebook, derisa në një emision sportiv lojtarit të Dritës, Kyrian Nwabueze, i kishte thënë ‘zezak’. Për këtë të fundit ‘baba’ i futbollit kosovar ka kërkuar menjëherë falje.