Koresë së Jugut s’i dhezi forja me numra, ky është plani ‘fantastik’ për ndeshjen me Meksikën

Në një Botëror që në ndeshjet e para ka treguar se është shumë i ekuilibruar, një informacion sado i vogël për kundërshtarin të jep përparësi.

Dhe këtu hyjnë në punë rrjeti i spiunazhit, të cilin çdo skuadër përpiqet ta shfrytëzojë maksimalisht. Nuk bën përjashtim as Koreja e Jugut, e cila ndeshjen e parë në grup e humbi me Suedinë. Aziatikët e kanë arkivuar këtë rezultat dhe e gjithë vëmendja tani është përqendruar te ndeshja e radhës, ajo kundër Meksikës ditën e shtunë.

Një grup gazetarësh koreanë kanë tentuar të spiunojnë stërvitjen me dyer të mbyllura të amerikano-qendrorëve. Siguria pranë ekipit trikolor zbuloi se ata po përpiqeshin që të regjistronin stërvitjen private të skuadrës së Osorios, 15 minuta pasi përfundoi leja e FIFA-s për gazetarët. Si arritën që ta shmangnin sigurinë? Pas përfundimit të kohës së stërvitjes me dyer të hapura, ata u ulën në kafenenë përballë qendrës stërvitore.

Me të pikasur koreanët që ishin duke studiuar çdo detaj të stërvitjes së kundërshtarit pa konsumuar asnjë pije, stafi i sigurisë shkoi dhe i largoi ata nga zona e ndaluar. Por, gazetarët e kuptuan që ishin zbuluar dhe u larguan nxitimthi përpara se siguria t’i shoqëronte. Pak ditë më parë, trajneri i Koresë u ndryshoi numrat lojtarëve në stërvitje, pikërisht që rivalët mos t’i njihnin.