Korniza e re në dialog me Serbinë: Deputeti i VV-së e quan ‘transparencë’ heshtjen totale të Qeverisë

Fundjavën që lamë pas, në media doli një kronikë që flet për kornizën e marrëveshjes me Serbinë, e cila siç u tha – duhet të nënshkruhet deri në vitin 2023.

Ky tekst, u publikua pas një takimi të paparalajmëruar të kryeministrit Kurti me kryeministri Edi Rama në Tiranë. Lidhur me këtë takim, kryeministri Kurti do të deklaronte të nesërmen në Prishtinë se veç tjerash ‘u diskutua edhe për situatën politike në Shqipëri dhe në Kosovë’.

Duket se temë diskutimi, mund të ketë qenë edhe ky dokument që publioi media dhe marrë parasysh edhe faktin se në atë takim, nga kabineti qeveritar, ishte edhe zëvendëskryeministri Besnik Bislimi, njëherit numri dy për dialog me Serbinë pas Kurtit.

Derisa Qeveria mbetet e mbyllur lidhur me temën e dialogut dhe askush asgjë nuk di, deputeti i Vetëvendosjes, Adnan Rrustemi, po e sheh Qeverinë tejet transaprente në këtë pikë.

“Për këto çështje ju sugjeroj t’i drejtoheni Qeverisë me pyetje konkrete dhe specifike. Në Kuvendin e Kosovës nuk ka pasë ndonjë diskutim lidhur me dialogun por ne vazhdojmë të qëndrojmë në atë që marrëveshja përfundimtare me Serbinë duhet të jetë ligjërisht e obligueshme me njohje në qendër. Ky është principi mbi të cilin duhet të zhvillohet dialogu. Transparenca ka qenë jashtëzakonisht e madhe, madje kryeministri ka takuar edhe përfaqësuesit e partive opozitare lidhur me dialogun, ka diskutime në Kuvend, Qeveria gjithmonë ka qenë e gatshme për të diskutuar e për t’u përgjigjur.  Unë mendoj që transparenca është e plotë, gatishmëria për t’i ndarë pikëpamjet e informacionet me deputetë”, tha Rrustemi sot para mediave, përcjell Periskopi.

Sipas ‘kornizës së re’ për dialogun, që e publikoi Albanian Post, në vitin 2023 duhet të nënshkruhet marrëveshja e dytë për normalizim të marrëdhënieve, pas asaj të vitit 2013, me të cilën Serbia faktikisht e pranon realitetin e Kosovës shtet të pavarur, por nuk e njeh formalisht. Në një fazë të mëvonshme, hipotetikisht pas 10 vitesh, atëherë kur BE-ja është e gatshme të zgjerohet dhe ta përfshijë Ballkanin perëndimor, arrihet marrëveshja për njohje të ndërsjellë, si parakusht i të dy shteteve për anëtarësim në BE./Periskopi