Mbi 100 raste aktive me Covid-19, Lipjani i mbyll sheshin, parqet, shtigjet e ecjeve dhe tregjet
Komuna e Lipjanit ka njoftuar që për shkak të situatës së krijuar nga rastet e fundit me COVID-19 në këtë komunë, është marrë vendim që të mbyllet përkohësisht sheshi “Adem Jashari”, parqet, shtigjet e ecjeve, këndet e lojërave dhe tregjet.
Përmes një njoftimi një faqen zyrtare, komuna ka kërkuar nga bizneset që t’iu përmbahen në tërësi kritereve dhe rekomandimeve për distancë në mënyrë që të parandalohet përhapja e virusit.
“Për zbatimin e këtij Vendimi obligohet Inspektorati komunal në bashkëpunim me Policinë e Kosovës”, thuhet në njoftim.
Ndryshe, që nga fillimi pandemisë e deri tash janë konfirmuar 232 raste me koronavius në këtë komunë dhe janë regjistruar pesë raste të vdekjeve.
Aktualisht atje janë 117 raste aktive me këtë sëmundje.
