Mustafa i mëshon Pecit: Është në gjendje të rëndë shpirtërore, unë s’jam mjek
Ministri i Bujqësisë, Faton Peci, i ka reaguar gjatë ditës së sotme ish-kryetarit të Lidhjes Demokratike të Kosovës, Isa Mustafa, i cili u deklarua për rezultatin e zgjedhjeve lokale duke përmendur edhe disfatën e Lëvizjes Vetëvendosje dhe Listës ‘Guxo’.
Peci e ka quajtur Mustafën “pensionist”, duke thënë se sa ishte në krye të LDK-së, e kishte dërguar partinë në skaj të ekzistencës.
Tutje, Peci e ka akuzuar Mustafën se ka qenë gjithmonë në dispozicion të Partisë Demokratike të Kosovës, kurdo që ajo ka pasur nevojë.
E për të gjitha këto fjalë e akuza, lajmi.net ka kontaktuar me Isa Mustafën, i cili ka thënë se i vjen keq që të lëshohet në nivelin e ministrit Peci, duke e cilësuar atë “adoleshent politikç”.
“Më vjen keq të lëshohem në nivel të një adoleshenti politik, i cili mban pozitë ministri, i cili ka shfrytëzuar pozita në qeverinë kur unë isha kryeministër. Çfarë të thuash për njerëz që i ke përkrahur, e të cilët tani si xhon turq në VV sillen dhe komunikojnë me mungesë të edukatës elementare”, ka thënë Mustafa.
Tutje, ai ka thënë se vetë fakti që ministri Peci reagon në këtë mënyrë, flet për gjendjen e tij psikologjike dhe shpirtërore.
“Vet fakti që reagon në këtë mënyrë flet për gjendjen e tij psikologjike dhe shpirtërore. Unë nuk jam mjek që t’i ndihmoj”, ka thënë Mustafa për lajmi.net.
Kujtojmë se në deklaratën e tij, ministri Faton Peci kishte thënë se është pikërisht Lista ‘Guxo’ që i kishte siguruar pensionimin politik Isa Mustafës, ndërsa këtë të fundit e ka akuzuar se ka qenë aksionar i shkatërrimit të partisë më të vjetër në vend.
