Punësimi i burrit të Albulena Haxhiut në Ministri: Stafit iu shkon një e-mail me tone kërcënuese

Pas raportimit të punësimit të burrit të ministres Albulena Haxhiu, Alban Krasniqit, në Ministrinë e Pushtetit Lokal, gazeta 10 ka publikuar një e-mail që përmban tone kërcënuese në drejtim të stafit.

Në e-mailin e nisur nga Venera Çerkini, sekretare e përgjithshme në ministri, e që e ka parë paralajmërohen punonjësit e kësaj ministrie se do të përballen me pasoja ligjore pas rrjedhjes së dokumentit që e dëshmonte punësimin e Alban Krasniqit në rolin e këshilltarit të jashtëm politik të Ministrit, Elbert Krasniqi.

E-maili i plotë i zonjës Çerkini ka këtë përmbajtje:

Siç e dini, dokumentet zyrtare sipas obligimit nuk keni të drejtë t’i shpërndani, ndërsa sot është shpërndarë

Vendimi i bashkangjitur sipas Ligjit për Qasje në dokumente publike, MAPL gjithmonë është e gatshme dhe e hapur t’u përgjigjet pyetjeve të parashtruara

P.S – Për këtë rast do t’i njoftoj organet kompetente për të ndërmarrë veprimet e nevojshme ligjore sa i përket kësaj shkelje ligjore.

10 dje në mesditë publikoi dokumentin e vendimit të punësimit të Alban Krasniqit, burrit të ministres së Drejtësisë, Albulena Haxhiu në Ministrinë e Pushtetit Lokal të Elbert Krasniqit.

Në reagimin e konfirmuar më vonë nga Krasniqi, thuhet se Alban Krasniqi do të punojë pa pagesë, porse mund të ketë angazhim nga një donator i jashtëm. Vetë ish-kandidati për kryetar të Malishevës dhe ministrja Haxhiu ende nuk kanë dalë me asnjë reagim.