Putin krahason veten me Petrin e Madh dhe jep sinjale se nuk do ndalet për pushtimin e Ukrainës

Periskopi.com Lajme

Dyshimet se Vladimir Putin nuk synon të ndalet në Ukrainë në përpjekjet e tij për të zgjeruar territorin e Rusisë kanë formuar një pikë mbështetëse për luftën qysh kur ai urdhëroi trupat e tij që të kalojnë kufirin në shkurt, shkruan Sky News, përcjell Periskopi.

Komentet televizive të bëra dje nga presidenti rus vetëm sa i kanë rritur shqetësimet e tilla.

“Petri i Madh ndërmori Luftën e Madhe Veriore për 21 vite. Mund të duket se ai ishte në luftë me Suedinë, që ai mori diçka prej tyre. Ai nuk mori asgjë nga ata, ai vetëm riktheu atë që ka qenë e Rusisë”, tha ai në një bashkëbisedim me disa të rinj.

Kur Petri krijoi qytetin e ri, “asnjë vend evropian nuk e njohu atë si Rusi. Çdokush e njohu si Suedi”, tha Putin.

“Çfarë ishte duke bërë Petri? Duke rikthyer. Kjo është ajo çfarë bëri”.

Ai pastaj krahasoi kampanjën e Petrit me detyrën që po përballet sot Rusia.

“Me sa duket, na përket neve ta rikthejmë atë që është e Rusisë dhe ta fuqizojmë vendin. Dhe nëse ne nisemi nga këto vlera bazike të bazës së ekzistencës tonë, ne sigurisht që do të kemi sukses në zgjidhjen  e detyrave që po përballemi”.

Dhe me sa duket qëndrimi më kërcënues erdhi kur ai duket se e la derën hapur për një tjetër zgjerim të territorit rus.

“Është e pamundur- e kuptoni- të krijoni pengesa rreth një vendi si Rusia dhe ne nuk kishim synim ndërtimin e diçkaje të tillë”, tha ai.

Putin, që është në vitin e tij të 23-të në pushtet, është përpjekur vazhdimisht ta arsyetojë veprimin e Rusisë në Ukrainë duke sajuar një histori se Ukraina nuk ka identitet të vërtetë dhe traditë të shtetësisë.