Rasti i vrasjes së gruas në Llaushë, Lumezi kërkon të hetohen prokurorja dhe mbrojtësi i viktimave

Kryeprokurori i Shtetit, Aleksandër Lumezi, ka kërkuar nga Kryeprokurori i Prokurorisë Themelore të Mitrovicës, Ismet Ujkani, që t’i shqyrtojë të gjitha veprimet e prokurores së rastit të gruas nga Llausha e Skenderajt e cila u vra nga bashkëshorti i saj.

Përmes një komunikate për media nga zyra e Kryeprokurorit të Shtetit, thuhet se do të ndërmerren masat e nevojshme ndaj prokurores, varësisht prej të gjeturave.

“Kryeprokurori i Shtetit, Aleksandër Lumezi, ka kërkuar nga Kryeprokurori i Prokurorisë Themelore në Mitrovicë, Ismet Ujkani, si autoritet kompetent, që të shqyrtojë të gjitha veprimet e prokurores lidhur me rastin e viktimës L.Q nga Llausha e Skenderajt dhe nga të gjeturat eventuale t’i ndërmarrë të gjitha veprimet e nevojshme sipas Ligjit për përgjegjësinë disiplinore të gjyqtarëve dhe prokurorëve”, thuhet në komunikatë.

Po ashtu, Lumezi ka kërkuar edhe nga Menaxheri i Zyrës për Mbrojtje dhe Ndihmë të Viktimave që të shqyrtojë veprimet e mbrojtësit të viktimave, lidhur me rastin në fjalë.

“Po ashtu, Kryeprokurori Lumezi ka kërkuar nga Menaxheri i Zyrës për Mbrojtje dhe Ndihmë Viktimave që të shqyrtojë të gjitha veprimet e mbrojtësit të viktimave lidhur me këtë rast dhe nga të gjeturat eventuale të ndërmerren edhe veprimet e nevojshme”, thuhet në komunikatë.

Ndryshe, ministrja e Drejtësisë, Albulena Haxhiu tw enjten ka reaguar ndaj prokurores kujdestare dhe mbrojtëses së viktimave në rastin e gruas në Llaushë që u vra nga burri i saj.

Haxhiu tha se mbrojtësja e viktimave paska kërkuar dërgim me email të lëndës në vend se të shkonte tek viktima sa ishte në polici.

Ajo shtoi se dy gra që është dashur të veprojnë për të mbrojtur jetën e viktimës, asnjëra nuk i ka kryer detyrat, e që sipas kësaj, kërkon që duhet të merren masa urgjente.

“Sipas informatave zyrtare, prokurorja kujdestare ka kërkuar që rasti të kualifikohet si “Dhunë në Familje” por edhe përkundër kësaj kishte kërkuar që rasti të procedohet në procedurë të rregullt pra që dhunesi të mbetet i lirë! Edhe përkundër kërkesave të vazhdueshme që të mos ketë tolerancë ndaj rasteve të dhunës në familje pra që dhunuesit të shkojnë prapa grilave, sërish neglizhohen këto raste të ndjeshme.

Ndërsa mbrojtësja e viktimave paska kërkuar dërgim me email të lëndës në vend se të shkonte tek viktima sa ishte në polici.

Dy gra që është dashur të veprojnë për të mbrojtur jetën e tani të ndjerës dhe asnjëra nuk i ka kryer detyrat prandaj duhet të ndërmerren masa urgjentisht!”, shkroi Haxhiu në Faceboook.

Ndërkaq sot ka reaguar edhe Policia e Kosovës, lidhur me rastin që kishte ndodhur më 1 janar, ku tashmë viktima L.Q. dhe bashkëshorti i saj ishin intervistuar, pas informatës që policia kishte pranuar për mosmarrëveshje në familjen e tyre.

Përmes një komunikate për media, Policia e Kosovës ka treguar se si kishte ndodhur rasti i cili ishte iniciuar si “Dhunë në familje”, më 1 janar.

“Policia e Kosovës, përmes linjës emergjente në Mitrovicë Jugu me datën 01.01.2022 kishte pranuar informacion se në një familje në fshatin Llaushë, kishte ndodhur një mosmarrëveshje familjare dhe bazuar në informatën e pranuar menjëherë ka angazhuar zyrtarët policorë të Skenderajt, të cilët i janë përgjigjur rastit. Njësitë policore me të arritur në vendin e ngjarjes, kanë ndërmarrë të gjitha veprimet e nevojshme policore ku nga kontakti i parë me viktimën, dëshmitarin dhe të dyshuarin kishin vërejtur dyshime se në familjen e tyre kishte ndodhur një mosmarrëveshje”, ka bërë të ditur policia.

Policia thotë se viktima kishte deklaruar se bashkëshorti nuk ka ushtruar dhunë fizike ndaj saj, e po ashtu se nuk ishte vërejtur ndonjë shenjë dhune te viktima.

“Edhe përkundër deklarimeve të ankueses se nuk ishte ushtruar dhunë fizike ndaj saj dhe nuk ishte vërejtur ndonjë shenjë dhune tek e njëjta, njësitë policore kanë shoqëruar të gjitha palët në stacionin policor Skenderaj. Me të arritur palët në stacion policor, me rastin ka filluar të merret hetuesi primar i dhunës në familje në kuadër të stacionit e cila: Kishte ftuar menjëherë përfaqësuesit e Qendrës për Pune Sociale (QPS) që të paraqiten në stacion, ku prezent gjatë intervistimit ka qenë përfaqësuesi i QPS-së”, thuhet në komunikatën e policisë.

Tutje, policia deklaron se është kontaktuar edhe Mbrojtësi i Viktimave, e cila ka kërkuar që lënda t’i dërgohet në mënyrë elektronike, pasi sipas saj, mbrojtësit e viktimave nuk paraqiten në të gjitha rastet në intervista.

“Po ashtu menjëherë është kontaktuar edhe Mbrojtësi i Viktimave, e cila kishte kërkuar që lënda të dërgohet në formë elektronike tek e njëjta, pasi e njëjta ka sqaruar se mbrojtësit e viktimave nuk paraqiten në të gjitha rastet në intervista, përjashtuar në disa raste të caktuara, por lëndën hetuesit ua përcjellin në formë elektronike, përveç nëse prokurori udhëzon ndryshe”, thuhet në komunikatën e policisë.

Sipas policisë, hetuesja e dhunës në familje kishte inkurajuar ankuesen që të shkojë për kontrolle mjekësore, por e njëjta nuk kishte pranuar, pasi nuk kishte pasur lëndime apo dhunë fizike.

“Po ashtu hetuesja e dhunës ne familje kishte inkurajuar ankuesen/viktimën që të shkojnë për kontrolle mjekësore por e njëjta nuk kishte pranuar pasi që nuk kishte pasur lëndime apo dhunë fizike”, thotë policia.

Sipas policisë, ankueses iu kishte prezantuar mundësia për të ia siguruar urdhrin mbrojtës dhe për t’u strehuar në strehimore, por djali i saj kishte insistuar që nëna të kthehet në shtëpi, e të mos shkojë as te familja e saj, pasi ai do të kujdeset që prindërit të mos kenë probleme në mes vete.

“Ankueses/viktimës iu kishte prezantuar nga hetuesja e rastit mundësia për të ju siguruar urdhrin mbrojtës dhe për tu strehuar në strehimore, ku kërkesa për këtë kishte mbetur ti dërgohet mbrojtësit të viktimës, por me insistimin e djalit të saj (moshës madhore), i cili ka kërkuar nga nëna që të mos largohet nga shtëpia, të mos shkon as tek familjaret e saj (dajët) por as në strehimore, me faktin se nuk ka arsye të largohet nga shtëpia, pasi do të kujdesen që prindërit mos të kenë më probleme mes vete, e njëjta është pajtuar dhe ka vlerësuar të qëndroj në familje e jo të dërgohet në strehimore”, ka njoftuar policia.

Atë ditë, policia ka intervistuar edhe djalin e saj, në cilësi të dëshmitarit.

“Sipas procedurave të parapara ligjore është kontaktuar prokurori kujdestar, ku sipas udhëzimeve të prokurores kujdestare ishte vendosur që rasti të kualifikohet “Dhunë ne Familje” dhe të procedohet në procedurë të rregullt. Përveç deklaratës se viktimës, në cilësi të të dyshuarit është intervistuar bashkëshorti i viktimës si dhe djali i tyre në cilësi të dëshmitarit; Vlen të potencohet se viktima është pajisur me pakon informuese të viktimës”, ka bërë të ditur policia.

“Policia e Kosovës me zyrtarët kompetent, në rastin në fjalë ka ndërmarrë të gjitha veprimet e nevojshme sipas procedurave të parapara ligjore dhe rekomandimeve të autoriteteve kompetente”

Policia ka deklaruar se në rastin e vrasjes, më 5 janar, janë ndërmarrë të gjitha veprimet e nevojshme, konform autorizimeve ligjore.

“Ndërsa me datë 05.01.2022 ka ndodhur rasti i cilësuar “Vrasje e Rëndë”, ku Policia e Kosovës po ashtu ka ndërmarrë të gjitha veprimet e nevojshme konform autorizimeve ligjore, në bashkëpunim dhe koordinim me organet e drejtësisë. Personi i dyshuar është paraqitur në stacion policor, ndaj të cilit pas intervistimit me urdhër të prokurorit kompetent iu është caktuar masa e ndalimit prej 48 orësh, ndërsa arma zjarrit e llojit pistoletë me tre fishekë dhe dëshmitë tjera janë konfiskuar në cilësi të provave materiale”, ka deklaruar policia.