Rritet bilanci: Raportohet viktima e 7-të nga koronavirusi në Itali

Periskopi.com Lajme

Ka shkuar në shtatë numri i viktimave në Itali si pasojë e koronavirusit.

Mësohet se personi i infektuar që ka humbur jetën është një 80-vjeçar nga Castiglione D’Adda. Aktualisht, numri i të prekurve nga virusi me origjinë nga Kina ka arritur në 230.

Lombardia është rajoni me numrin më të madh të rasteve, për të vazhduar me Veneto-n, Emilia Romagna-n,  Piemonte-n dhe  Lazio-n. Por, ka edhe një lajm të mirë, një nga të sëmurët, është shëruar. Milano, falë edhe mbylljes së shkollave, është e zbrazur; metroja dhe trenat janë bosh. Ndërkohë, në Vo, në Veneto, kanë nisur kontrollet nëpër rrugë. Brenda dhe jashte aeroporteve, kontrollet jane te shumta ndërkohë që në aeroportin e Fierences është e pranishme edhe ushtria.

Shumë qytetarë i janë drejtuar supermarketeve për të blerë ushqime në rast emergjence duke i lënë raftet atje, thuajse të zbrazura. Në Lion ndërkohë është bllokuar një autobus nga Italia ndërsa në Mauricius, është ndaluar zbarkimi i italianëve nga zonat e rrezikut, ndërsa gjithnjë e më shumë po diskutohet tani për pezullimin e Shengenit. Austria, një ditë më parë bllokoi kufijtë me Italinë ndërsa Franca dhe Zvicra thanë se për momentin nuk do të ndiqnin këtë shembull.

Nisur nga zhvillimet në Itali, një mision i përbashkët i BE dhe OBSH do të mbërrijë në vend ndërkohë që komisioni evropian ka akorduar 230 milionë euro për të ndihmuar luftën globale kundër përhapjes së koronavirusit./Tch

Shpërndaje në: