Vetëm dy orë para lojës, FFK njofton se kampionati fillon sot
Federata e Futbollit të Kosovës ka njoftuar për fillimin e kampionatit të ri në Superligë vetëm dy orë para nisjes së ndeshjes së parë, shkruan Gazeta Express.
Duke e publikuar orarin e ndeshjeve, shtëpia e futbollit kosovar ka njoftuar ndërkohë se sezoni 2020/2021 do të fillojë sot me ndeshjen ndërmjet Trepçës ’89 dhe debutuesit të ligës elitare, Arbëria.
Institucioni më i lartë i futbollit kosovar nuk ka dhënë detaje nëse ka marrë leje apo jo nga organet qeveritare për fillimin e sezonit të ri, duke e zbuluar vetëm orarin dhe zyrtarët e ndeshjeve.
FFK ishte në dilema deri pak orë para fillimit të sezonit, nëse ai do të niste këtë javë apo jo.
Në fakt, nisja e edicionit të ri ishte shtyrë për një javë pasi paraprakisht ishte paraparë të fillonte më 12 shtator.
Ndeshjet tjera do të zhvillohen nesër dhe pasnesër.
