Indi: Konfiskohen mbi 2 miliardë euro heroinë nga Afganistani
Një sasi e madhe e drogës e llojit “Heroinë” është gjetur në një port detar në perëndim të Indisë.
Droga ka një sasi prej gati tre tonë dhe një vlerë prej me mbi 2 miliardë euro.
U arrestuan dy indianë, ndërsa droga u gjet në dy kontejnerë në portin e rajonit perëndimor, Gujarat, shkruan The Guardian.
Njëri nga kontejnerët mbante një sasi prej rreth dy mijë kilogramë heroinë, kurse në tjetrin rreth 1 mijë kilogramë.
Prejardhja e drogë është nga Afganistani, por dërgesa ishte nisur me anije nga një port në Iran.
Organet indiane thanë se dyshohet që në transportimin e drogës, përpos indianëve, kanë qenë të përfshirë edhe disa shtetas afganë, ndonëse asnjë person tjetër nuk është arrestuar deri më tani.
Prodhimi i heroinës është rritur shumë viteve të fundit në Afganistan, duke ndikuar në financimin e talibanëve, të cilët u kthyen në pushtet muajin e kaluar.
Përpjekjet e Shteteve të Bashkuara dhe të komunitetit ndërkombëtar për ta kontrolluar tregtimin e heroinës kanë qenë kryesisht të pasuksesshme.
