Abazi për dorështrëngimin Thaçi-Kurti: Dje u bëmë bashkë për Republikën

Periskopi.com Lajme

Zv.kryeministri Haki Abazi i cili ka qenë personi përgjegjës i grupit punues për organizimin e ngjarjeve të pavarësisë ka thënë se dje Kosova kaloi një ditë feste të rëndësishme në udhëtimin tonë si komb, përkrah kombeve tjera.

Ai ka thënë se u bënë bashkë të gjithë për Republikën, për guximin që i duhet vendit për të kryer detyrat e përditshme në realizimin e qëllimeve tona, duke arsyetuar veprimi e Albin Kurtit për shtrëngimin e duarve me presidentin Hashim Thaçi.

Kujtojmë që zyrtarë të VV’së kishe reaguar ashpër ndaj Shpend Ahmetit kur ai kishte shtrënguar duart me Thaçin.

Postimi i tij:

Urime edhe sot!

Dje kaluam nje ditë feste, feste e rëndësishme në udhëtimin tonë si komb, përkrah kombeve tjera. Të tjerët janë para nesh, ata bënë shtetin kur ne sikur luftonim njëri tjetrin e Besën u falëm të huajve. Dje ishte ndryshe, Besën njëri tjetrit, për vendin.

Dje, ishte ditë e bukur në të gjitha anët, në Prekaz dielli bënte dritë e shpirtrat e familjes Jashari i jepnin shkëlqimin vendit tonë. Ndëgjohet thirrja për të ruajtur cdo kontribut, secilin moment të luftës së lavdishme të UÇK, bijave dhe bijëve të vendit, heronjëve të historisë dhe patriotëve që nuk u dorëzuan asnjeherë. Lavdi e përjetshme!

Në Velani u bëmë bashkë për qëllimin e madh për të cilin luftuan, dhanë jetën, u sakrifikuan dhe lanë amanet për ta bërë shtetin për ta ruajtur kombin. Edhe Presidenti Rugova edhe heroi- Mandela ynë, Demaçi kanë dhënë drejtim dhe vizion për të ardhmën dhe qëndrueshmërinë përballë pengesave. Të gjihë Dëshmorët që pushojnë në tokën për të cilën ranë- janë skalitur përjetësisht në historinë e kombit tonë.

Dje, Kuvendi i Republikës rrezatoi vlerë, sinqeritet, unitet, respekt për të gjithë, pa përjashtim.

Dje si çdo ditë, roja e shtetit tonë, ushtria dhe ushtarët tanë na bënë krenar, të mbrojtur dhe të sigurtë. Uniforma është e jona!

Dje, u bëmë bashkë për ardhmërinë tonë, për Republikën, për guximin tonë që na duhet për të kryer detyrat e përditshme në realizimin e qëllimeve tona. Dje shteti dhe qytetari ishin bashkë, ashtu do të vazhdojmë!

Kërkoj falje për ndonjë lëshim që ka mundur të ndodhë dhe të jeni të sigurt që nuk e kemi bërë me qëllim!