Eurozona vendos: Nuk ka më kartëmonedha të 500 eurove

Periskopi.com Lajme

Eurozona do të ndalë së printuari kartëmonedhat 500-euroshe, apo prerjet në ngjyrë violetë që sipas autoriteteve janë mjeti më i përdorur nga kriminelët, teksa shumica e 19 vendeve që i janë bashkuar monedhës së përbashkët pritet ta zbatojnë nga muaji i ardhshëm.

“Më 27 janar të 2019-s, 17 nga 19 Bankat Qendrore kombëtare në zonën e Euros nuk do të lëshojnë më kartëmonedha 500-euroshe”, njoftoi Banka Qendrore Europiane në faqen e saj të internetit.

Gjithsesi, Austria dhe Gjermania do të vazhdojnë të printojnë kartëmonedha të tilla deri më 26 prill, “në mënyrë që të garantohet një tranzicion i lehtë, por edhe për shkaqe logjistike”, shkruhej më tej në njoftimin e BQE-së.

Kartëmonedhat 500-euroshe në qarkullim, gjithsesi do të mbeten të ligjshme dhe do të mund të përdoren për të kryer pagesa.

Banka Qendrore Europiane njoftoi në maj të vitit 2016 se do të ndalte së prodhuari kartëmonedhat 500-euroshe, duke thënë asokohe se pritej ta bëhet këtë gjë rreth fundit të vitit 2018, për shkak të “shqetësimeve se këto monedha lehtësojnë aktivitetet e paligjshme”.

Kartëmonedha me prerjen më të madhe të zonës së monedhës së përbashkët është një prej më të vlefshme në botë, së bashku me kartëmonedhën 1.000 franga zvicerane (1.017 USD apo 888 euro).

Për shkak të vlerës së lartë të saj dhe mbartshmërisë, ekspertët besojnë se kartëmonedhat 500-euroshe janë bërë të vyera për kriminelët që pastrojnë paratë apo edhe për financimin e terrorizmit, duke fituar kësisoj edhe pseudonimin “Bin Laden” në disa qarqe.

Sipas statistikave të BQE-së, kartëmonedhat 500-euroshe zënë rreth 2.4 për qind të të gjitha kartëmonedhave në qarkullim, por vetëm pak më shumë sesa 20% të vlerës në total.

Ekonomia e Evropës po ngadalësohet, e thonë ekspertët

Periskopi.com Lajme

Ekonomia e Europës pati performancën më të mirë të saj në dekada të tëra, gjatë vitit 2017, e nuk do të ketë një të dytë si ai, të paktën në të ardhmen e afërt.

Rritja pritet të ngadalësohet në mënyrë dramatike këtë vit, ndërsa Europa përballet me barriera të reja tregtare, paqartësi në lidhje me “Brexit”-in dhe ndarje politike që dëmtojnë besimin në Eurozonë dhe i vendosin bankat nën stres.

“Koktejli i rreziqeve që vijnë nga jashtë ka qenë një burim shqetësimi në rritje”, thotë Florian Hense, ekonomist në bankën “Berenberg”.

Banka Qendrore Europiane vlerëson se rritja e Eurozonës do të ngadalësohet në 2 për qind këtë vit, krahasuar me 2.5 për qind në vitin 2017. Europa, që ka njohur një rritje më të shpejtë se Shtetet e Bashkuara vitet e fundit, tani po mbetet sërish prapa dhe biznesi po e ndien i pari acarin.

Një studim i publikuar ditët e fundit tregonte se, ekonomia e Eurozonës u rrit me ritmin më të ngadaltë në më shumë se dy vite, në tetor. Studimi sugjeron që konfliktet globale tregtare po reduktojnë kërkesën për eksporte europiane.

Banka Qendrore Europiane njoftoi të enjten se, të dhënat nuk ishin aq të zymta sa ajo të rimarrë në konsideratë rishikimin e planeve për të mbyllur programin e saj stimulues në dhjetor. Banka ka shtuar efektivisht 2.8 trilionë euro në ekonomi, që nga viti 2015, duke blerë bono qeveritare.

“Ky është një moment i dobët, por nuk është i mjaftueshëm që në të ndryshojmë skenarin bazë”, tha presidenti i BQE-së, Mario Draghi. “Ne po flasim për një moment të dobët, jo një kthim prapa”, shtoi ai.