Zëdhënësja e Qeverisë: Nuk kemi asgjë zyrtare nga SHBA për heqjen e taksës ndaj Serbisë

Periskopi.com Lajme

Qeveria e Kosovës ka mohuar të ketë marrë ndonjë shkresë zyrtare nga qeveria e Shteteve të Bashkuara të Amerikës lidhur me heqjen e taksave ndaj Serbisë.

Në një përgjigje shkurt për Periskopit, zëdhënësja e Qeverisë, Donjeta Gashi ka thënë se Qeveria e Kosovës nuk ka pranuar asgjë në formë zyrtare lidhur me këtë çështje.

“Diçka e tille nuk ka mbërri ne adresë të Qeverisë së Kosoves. Nuk kemi kerkesë zyrtare sepse dy Qeverite zakonisht komunikojnë ne forma zyrtare. Dhe ne forme zyrtare për momentin nuk kemi kerkesë të tillë”, ka thënë Gashi për Periskopin.

Ndryshe, u raportua se Këshilli i Sigurisë Kombëtare të SHBA-ve dhe Departamenti i Shtetit Amerikan kanë formësuar pozicionin e tyre lidhur me zhvillimet aktuale në Kosovë, respektivisht çeshtjen e taksës së vendosur nga qeveria dhe dialogun ndërmjet Kosovës dhe Serbisë.

Media si Klan Kosova ka raportuar se kanë siguruar mesazhin e qartë i cili tashmë iu është transmetuar edhe në formë të shkruar autoriteteve shtetërore kosovare.

Ky qëndrim i prerë i administratës amerikane është përmbledhur në tetë pika kryesore:

  1. “Masat tarifore janë marrë pa asnjë konsultim me Shtetet e Bashkuara të Amerikës”.
  2. “Shprehim zhgënjimin e thellë që pas letrës së Presidentit Trump drejtuar Presidentit Thaçi, jo vetëm që nuk ka pasur reflektim pozitiv nga ana e Qeverisë së Kosovës, por janë shtuar produktet të cilat i nënshtrohen tarifës“.
  3. “Kërkojmë pezullimin e menjëhershëm të tarifës. E njëjta tarifë mund të rivendoset në rast se dështon marrëveshja me Serbinë“.
  4. “Mbështetja e SHBA-ve për Kosovën nuk është e pakushtëzuar. Kosova për momentin e bart barrën e rrezikimit të dështimit të dialogut“.
  5. “Nëse tarifa nuk suspendohet urgjentisht, SHBA-të do të suspendojnë asistencën në fushën e sigurisë, pra mbështetjen për FSK“.
  6. “Suksesi dhe arritja e marrëveshjes nuk ndërlidhen me rolin e znj. Federica Mogherini dhe BE-në. Arritja e marrëveshjes është interes strategjik i SHBA-ve, prandaj është e papranueshme për ne vënia në pikëpyetje e këtij qëllimi strategjik nga ana e veprimeve të papergjegjshme të liderëve kosovarë”.
  7. “Në rast se marrëveshja dështon për shkak të Kosovës, barrën e përgjegjësisë dhe pasojat do t’i bartë vetë Kosova dhe individët përgjegjës për këtë dështim“.
  8. “Kosova me sjelljet e saja të papërgjegjshme po e rrezikon seriozisht miqësinë me SHBA-të”.